Гучы, наша родная мова!
Якія цудоўныя назвы і словы,
Якая цудоўная родная мова!
І ўсё мілагучна для слыху майго:
І звонкае “дзе”, і густое “чаго”.
П.Панчанка
З 20 па 25 лютага ў ДУА “Сярэдняя школа № 8 г. Светлагорска” праходзіў тыдзень беларускай мовы і літаратуры пад дэвізам “Гучы, наша родная мова!”, прысвечаны Міжнароднаму дню роднай мовы. Кожны год настаўнікі разам з дзецьмі прыдумваюць цікавыя конкурсы, віктарыны, каб тыдзень прайшоў захапляльна. На такіх мерапрыемствах вучні раскрываюць свае таленты: мастака, вядучага, арганізатара, літаратара, моваведа, этнографа. А для настаўніка галоўнае, каб гучала роднае слова. На працягу тыдня праводзіліся экскурсіі для вучняў у школьным музеі, у якім знаходзяцца прадметы побыту беларуса, прылады працы, адзення, куткі беларускай хаты. На перапынках гучалі беларускія песні. У фае арганізавана выстава “Любі роднае слова”, дзе былі сабраны самыя цудоўныя словы пра беларускую мову знакамітых людзей. Нават у сталовай дзецям прапаноўвалі беларускія стравы: бульба тушаная з мясам, калдуны. У бібліятэцы была арганізавана выстава кніг пісьменнікаў-юбіляраў 2017 года.
Спадабаўся вучням 7 “А” класа ўрок “Свята беларускіх гаспадынь”(настаўнік Ларыёнава І.М.), дзе яны адгадвалі назвы беларускіх свят, песень, спрабавалі і адгадвалі ежу і іншае. У вострай і напружанай барацьбе перамаглі лепшыя знаўцы роднай мовы, культуры, традыцый беларусаў: Карасёў Альбін, Лампееў Слава, Сілівончык Іван.
Цікавым было мерапрыемства для вучняў 8-ых класаў пад назвай “Ведай і любі родную мову”(настаўнік Баранава Т.Я.). Конкурсы былі розныя:“ Адгадай фразеалагізм”, “Пазнай песню і назаві аўтара”, “Хто хутчэй”. Вучням настолькі спадабалася ўдзельнічаць у конкурсах, што яны не маглі спыніцца, жадалі працягу. Значыць, наша мова жыве. Дзеля гэтага трэба працаваць.
У 10 класе прайшоў урок-паўтарэнне па тэме “Сістэма часцін мовы ў беларускай мове. Назоўнік: агульнае значэнне, марфалагічныя прыметы, сінтаксічная роля. Лексіка-граматычныя разрады назоўнікаў. Лік і род назоўнікаў”(настаўнік Чыжык Т.Г.).
У 6 “В” класе прайшло мерапрыемства ў форме КВЗ пад назвай “Любі, шануй, ведай роднае слова!”(настаўнік Камарова Т.М.). Удзельнічалі дзве каманды: “Слова” і “Сказ”. Барацьба была напружанай, але з невялікім адрывам перамагла каманда пад назвай “Слова”: Верас Анастасія, Дуброўскі Аляксей, Бандарэнка Валерыя, Ахрамчук Ілья, Шэндзелева Дар’я, Аўсянікава Аляксандра. Вучні атрымалі дыпломы.
Праводзіўся конкурс “Чытай сваё! Чытай роднае!”, які ўразіў колькасцю ўдзельнікаў, іх адказнасцю. Вучні чыталі вершы Я.Коласа і Я.Купалы (135-годдзе з дня нараджэння класікаў). Былі падведзены вынікі і ўручаны падзякі самым актыўным удзельнікам: 1 месца - Сушчык Анастасія (Я.Купала “Малітва”), 2 месца – Казакова Алеся (Я.Колас “Ворагам Беларусі”), і Філіпчык Аляксей (Я.Купала “Не глядзі”), 3 месца – Лебедзева Віялета і Гайшун Паліна. А ў суботу вучні наведалі Бабруйскі тэатр імя Д.Марцінкевіча.
Тыдзень прайшоў цікава і захапляльна. Вучні пашырылі свой кругагляд і паглыбілі свае веды.
Кіраўнік МА ДУА “Сярэдняя школа № 8 г. Светлагорска” Т.Г.Чыжык.(гэта інфармацыя змешчана на школьным сайце і адпраўлена ў газету “Светлагорскія навіны”)
